Литванскиот министер за надворешни работи Кестутис Будрис изјави дека предлогот силите на НАТО да бидат подготвени за напад врз Калининград има цел да ја демонстрира решителноста на балтичките земји.
Во интервју за литванскиот јавен сервис ЛРТ, Будрис истакна дека Литванија и другите балтички држави мора да ги разбијат митовите за нивната неспособност да се одбранат.
„Ние се браниме затоа што ќе браниме повеќе од само сопствената територија. Проблемот не е Сувалскиот коридор – проблем се капацитетите што се достапни во Калининград. Мораме да ја пренесеме оваа доверба до нашите западни партнери за да видат повеќе од кошмарни сценарија. Пораката е: знаеме што треба да правиме и нема да се двоумиме – ќе дејствуваме кога ќе биде потребно. Најважно е одвраќањето, затоа што токму тоа обезбедува мир“, изјави Будрис.
Тој и претходно повика НАТО да покаже дека има капацитет да ја „срамни со земја руската тврдина“ во Калининград и да ги неутрализира руските противвоздушни системи и ракетни бази. Притоа не прецизираше на кои конкретни средства мисли, ниту под кои околности Алијансата би го демонстрирала тој потенцијал.
Портпаролот на Кремљ, Дмитриј Песков, ваквите изјави ги оцени како „ставови што се граничат со лудило“.
Рускиот министер за надворешни работи Сергеј Лавров, пак, изјави дека ваквите закани не треба да се сфаќаат сериозно и оцени дека Вилнус на тој начин само се обидува да го оправда своето постоење на меѓународната сцена.
Рускиот претседател Владимир Путин претходно предупреди дека Москва ќе ги елиминира сите закани кон Калининградската област доколку се појават. Според него, евентуална блокада на регионот би можела да доведе до невидена ескалација на конфликтот.
