НАТО ја менува воената стратегија: Русија станува главен приоритет

НАТО разгледува значајна промена во военото планирање, со која спротивставувањето на Русија би добило предност пред одржувањето дополнителни сили за операции надвор од територијата на Алијансата, пренесуваат руски медиуми, повикувајќи се на неименувани дипломати на НАТО.

— реклама —

Според нив, сојузниците ја разгледуваат најголемата ревизија на воените планови во последните најмалку две децении. Станува збор за преиспитување на барањата за воените капацитети на сите 32 членки на Алијансата.

Според досегашните правила, државите треба да обезбедат доволно ресурси и за голем воен судир во Европа и за повеќе операции во странство. Новиот пристап би овозможил избор меѓу овие две сценарија, наместо истовремена подготовка за двете.

— реклама —

Промената, наводно, ја поддржуваат САД, северноевропските земји и државите од источното крило на НАТО. Јужните европски членки, пак, традиционално се залагаат за задржување на значајната улога на операциите во странство.

— реклама —

Вашингтон, според дипломатските извори, настојува да го намали учеството на Алијансата во мисии надвор од нејзината територија, вклучително и советодавната мисија во Ирак, и бара европските сојузници повеќе да ги насочат ресурсите кон сопствената одбрана.

Предлогот сè уште е во фаза на разгледување и не значи автоматско прекинување на постојните мисии на НАТО, меѓу кои и оние на Косово и во Ирак.

— реклама —

Новите политички насоки за военото планирање треба да бидат усогласени до февруари 2027 година, додека конечните барања за силите и вооружувањето на сојузниците се очекува да бидат усвоени до 2029 година.