Лидерите на земјите членки на НАТО следната недела ќе се соберат на самит во Анкара, каде што европските сојузници ќе настојуваат да ги стават во втор план несогласувањата со американскиот претседател Доналд Трамп околу Иран и Гренланд и да покажат дека преземаат поголема одговорност за одбраната на Европа.
Генералниот секретар на НАТО, Марк Руте, изјави дека самитот ќе биде можност европските сојузници да покажат дека ги исполнуваат обврските за зголемување на трошоците за одбрана, со цел зајакнување на одвраќањето од евентуална руска закана. Според него, се очекува да бидат потпишани договори за набавка на вооружување, вредни десетици милијарди долари.
На самитот се очекува лидерите да ја потврдат и поддршката за продолжување на воената помош за Украина. Украинскиот претседател Володимир Зеленски ќе присуствува на свечената вечера што ќе ја организира турскиот претседател Реџеп Таип Ердоган, кој ќе има и билатерална средба со Доналд Трамп.
Европските претставници се надеваат дека добрите односи на Трамп со Ердоган и Руте ќе придонесат самитот да помине без поголеми тензии, иако трансатлантските несогласувања остануваат присутни поради војната со Иран и честите критики на американскиот претседател кон НАТО.
Во пресрет на самитот, Трамп повторно оцени дека САД трошат премногу средства за заштита на европските сојузници, додека Руте нагласи дека НАТО придонесува и за безбедноста на Соединетите Американски Држави и дека европските членки веќе значително ги зголемиле издвојувањата за одбрана.
Сепак, европските дипломати предупредуваат дека евентуално ново заострување на ситуацијата на Блискиот Исток би можело да го засени самитот, а дополнителна неизвесност создава и најавеното намалување на американското воено присуство во Европа. И покрај тоа, во Алијансата очекуваат лидерите да покажат единство и да испратат порака за зајакнување на колективната безбедност.
