НАТО се собира во Анкара: Европа ќе преземе поголема одговорност за својата одбрана

Лидерите на земјите членки на НАТО утре и задутре ќе се состанат во Анкара, каде што ќе разговараат за иднината на Алијансата, со акцент на поголемата улога на европските сојузници во одбраната на континентот.

— реклама —

Во рамките на самитот ќе се одржи и состанок на шефовите на државите и владите, кој, според дипломатски извори, е скратен во однос на претходните собири.

Американскиот министер за одбрана Пит Хегсет неодамна порача дека целта е НАТО да стане „поизбалансиран сојуз“, во кој Европа ќе ја преземе водечката улога во сопствената конвенционална одбрана, додека Соединетите Американски Држави ќе продолжат да обезбедуваат нуклеарно одвраќање и стратешка разузнавачка поддршка.

— реклама —

Генералниот секретар на НАТО, Марк Руте, истакна дека сега е време преземените обврски да се претворат во конкретни резултати преку поголеми инвестиции во одбраната, зголемено воено производство и континуирана поддршка за Украина.

— реклама —

Една од главните теми на самитот ќе биде и исполнувањето на договорот постигнат на претходниот самит во Хаг, според кој речиси сите земји-членки се обврзаа до 2035 година да издвојуваат пет проценти од својот бруто-домашен производ за одбранбени потреби. Од нив, 3,5 проценти се наменети за директни воени трошоци, а останатите 1,5 проценти за активности поврзани со безбедноста и одбраната.

Американскиот амбасадор во НАТО, Мет Витакер, оцени дека дел од членките, меѓу кои Полска, скандинавските земји, балтичките држави и Германија, веќе предничат во исполнувањето на обврските, додека други сè уште заостануваат.

— реклама —

Според проценките, Албанија, Чешка и Словенија годинава би можеле да останат под претходно утврдената цел од два проценти од БДП за одбраната, поради што се очекува да бидат под дополнителен притисок за зголемување на воените издвојувања.