НАТО во моментов не гледа непосредна опасност од руски напад врз некоја од земјите членки, но предупредува дека Москва ги засилува хибридните активности во Европа и нападите врз Украина.
Неименуван претставник на НАТО изјави дека, и покрај силниот отпор од Украина, Русија ги засилува нападите врз земјата, како и хибридните активности на европскиот континент.
„Во овој момент не гледаме непосредна опасност од напад“, рекол претставникот, додавајќи дека НАТО останува во состојба на готовност и внимателно ги следи можните закани.
Полскиот премиер Доналд Туск вчера предупреди дека Полска и НАТО мора да бидат подготвени за различни сценарија и оти не може да се исклучи можноста за руска провокација против некоја членка на Алијансата.
Загриженоста е дополнително зголемена по неодамнешната посета на директорот на ЦИА, Џон Ретклиф, на Русија. Според извори запознаени со средбата, Ретклиф разговарал со претставници на руските разузнавачки служби и ја споменал можноста Москва да изведе операција против земја членка на НАТО.
Во меѓувреме, Германија истражува обид за напад со дрон врз аеродромот Лајпциг/Хале. Германскиот канцелар Фридрих Мерц најави дека владата наскоро ќе соопшти кој е одговорен за инцидентот.
Русија ги отфрла обвинувањата дека планира саботажи или напади во Европа, оценувајќи ги ваквите тврдења како обид за заплашување од страна на Западот.
