„Не им дозволуваат на граѓаните да си ги земат парите за да го спасат капиталот на криминалната банка“, обвини Филипче зборувјќи за „Алта“

Претседателот на СДСМ, Венко Филипче, упати сериозни обвинувања за потеклото на капиталот на Алта банка и побара одговорност од гувернерот на Народната банка, Трајко Славески, и премиерот Христијан Мицкоски. Тој тврди дека најавената продажба на македонската банка не може да се реализира толку брзо како што се најавува и дека граѓаните се соочуваат со ограничен пристап до своите средства.

„Една година укажуваме дека на нашиот финансиски пазар влегува несоодветен субјект, со сомнителни финансии. Сите информации сè повеќе излегуваат на виделина по смената на власта во Србија“, изјави Филипче.

Тој посочи дека активата на банката во Србија, според неговите тврдења, пораснала 13 пати за период од пет до шест години, што го поврза со сомнежи за незаконско потекло на парите

— реклама —

„Станува збор за банка која за 5-6 години 13 пати, невидено во банкарскиот сектор, ја зголемило својата актива. Тоа е можно само ако има пари од криминал, корупција и шверц на дрога“, рече Филипче.

Станува збор за сериозни обвинувања на опозицискиот лидер, за кои во доставената изјава не се наведени конкретни докази што би потврдиле дека растот на активата произлегува од криминални активности.

Филипче го обвини гувернерот Славески дека не постапил соодветно при влегувањето на српскиот капитал во македонскиот банкарски сектор.

„Трајко Славески не постапил по закон, кажа дека не го познавал газдата на Алта банка, а требало да го знае, за да знае кој влегува на нашиот финансиски пазар“, изјави претседателот на СДСМ.

— реклама —

Според него, одговорноста за неизвесноста кај штедачите е кај гувернерот и премиерот.

Тој ја оспори и можноста брзо да се најде нов сопственик за Алта банка АД Битола, тврдејќи дека по стечајот на мнозинскиот акционер во Србија, за располагањето со акциите е надлежен стечајниот управник.

„Гувернерот посегнува по некаква продажба на акциите, а вистината е дека не може тоа да го направи Народна банка, туку стечајниот управник во Србија. Сето тоа не е возможно како што најавува гувернерот, иако знаеме дека сака. Тоа не е процес од 10 дена“, рече Филипче.

— реклама —

Тој постави прашање дали воопшто може брзо да се пронајде инвеститор заинтересиран за преземање на банката во вакви околности.

„Кој би влегол во банка која е под истрага во Србија и под будното око на Европа? Тоа така брзо нема да може да го реши“, оцени Филипче.

Претседателот на СДСМ смета дека Славески го загубил кредибилитетот да одлучува за иднината на банката.

„Како да му веруваат на гувернерот дека ќе донесе добра одлука за продажба на оваа банка, кога донел лоша одлука кога Алта банка влегла на нашиот пазар? Тој нема кредилитет“, изјави Филипче.

— реклама —

На крајот, тој обвини дека ограничувањата за располагање со депозитите не се воведени за заштита на граѓаните, туку за зачувување на капиталот на банката.

„Сега не им дозволуваат на луѓето да си дојдат до своите пари, за да го зачуваат капиталот на криминалната банка“, рече Филипче.

Народната банка претходно соопшти дека Алта банка АД Битола е самостоен правен субјект, ликвиден и високо капитализиран, а привремената администрација е воведена како мерка за заштита на депонентите и стабилноста на банкарскиот систем. Обвинувањата на Филипче за криминално потекло на капиталот и незаконско постапување на гувернерот засега остануваат негови политички тврдења.