Српскиот претседател Александар Вучиќ изјави дека претстојните избори ќе бидат тешка и неизвесна политичка трка, нагласувајќи дека неговата партија мора сериозно да се подготви и да не ја потцени конкуренцијата.
За време на посетата на изградбата на делницата од брзиот пат Бачки Брег – Српска Црња, Вучиќ одговараше и на новинарски прашања поврзани со изборите и случувањата во опозицијата.
„Ќе биде тешка изборна битка. Мораме добро да се подготвиме, нема место за опуштање и на крајот ќе победи подобриот“, изјави Вучиќ.
Во однос на несогласувањата меѓу опозициските партии, тој рече дека тоа не го интересира и дека е фокусиран исклучиво на резултатите од работата на власта.
Според него, најголем проблем на опозицијата е недостатокот на јасна програма и визија.
„Се покажа дека имаат многу проблеми, а пред сè недостиг од план и програма. Сè е поврзано со лични интереси. Ние мораме да победиме со реални резултати и со она што можеме да им го понудиме на граѓаните“, изјави Вучиќ.
