Советот за етика во медиумите на Македонија (СЕММ) ја отфрли како неоснована жалбата што бизнисменот и поранешен градоначалник на Скопје, Трифун Костовски, ја поднесе против поткастот „Претрес со Ландов“, оценувајќи дека во емисијата нема отстапување од професионалните и етичките стандарди при известувањето.
Костовски во претставката тврдеше дека во интервјуто биле прекршени повеќе одредби од Кодексот на новинарите, меѓу кои презумпцијата на невиност, точноста и проверката на информациите, почитувањето на човечкото достоинство и избегнувањето сензационализам. Според него, прашањата биле формулирани на начин што го ставале во позиција да се брани од недокажани тврдења и создавале „драмска рамка“ наместо аналитичко интервју.
Во одговорот доставен до СЕММ, потпишан од уредникот и водител на поткастот Кристијан Ландов, беше наведено дека Костовски бил поканет како долгогодишна јавна личност и дека сите прашања се однесувале на теми од неспорен јавен интерес. Во одговорот се посочува дека не е изнесена вина како факт, дека не се пласирани неточни информации како докажани факти, дека соговорникот добил целосен простор да одговори и дека делови од претставката се селективно цитирани и извадени од контекст. Притоа, посочува дека Костовски ги вадел речениците од контекст, ги доставил половични, па се доставени и целосни транскрипти за да се добие точниот впечаток за поставените прашања.
Комисијата за жалби оцени дека поткастот „Претрес“ е конфронтирачки и полемички формат, заснован врз судир на ставови, директна расправа и читање нефилтрирани коментари од публиката. Според Комисијата, остриот тон, инсистирањето на одговори и прекинувањата сами по себе не можат да се сметаат за етички прекршок, туку се дел од природата на форматот.
Во образложението се наведува и дека од емисијата не произлегува впечаток на еднострана пресметка, туку дека Костовски активно учествувал во дебатата, ги оспорувал тезите на новинарот, возвраќал со контрааргументи и користел остри квалификации, нарекувајќи го Ландов, меѓу другото, „мало мангупче“.
Комисијата оцени дека спорните содржини не биле претставени како потврдени факти, туку како прашања, сомнежи, полемика или отворање теми од јавен интерес. Поради тоа, заклучи дека не се прекршени одредбите од Кодексот кои се однесуваат на точноста, презумпцијата на невиност и избегнувањето сензационализам.
Во изминатиот период, по гостувањето, Костовски со низа квалификации го напаѓаше Ландов по социјалните мрежи, пишувајќи колумни за него.
