„Не расте обемот, туку бруталноста во случаите на врсничко насилство - институциите ги зајакнуваат превентивните и казнените мерки“, вели Јаневска

Околу 50 случаи на врсничко насилство годишно во просек се пријавуваат во училиштата во последните три учебни години, но иако бројот не расте, загрижува зголемената бруталност во дел од случаите, истакна министерката за образование и наука Весна Јаневска.

Таа ова го посочи на панел-дискусијата „Меѓуврсничко насилство и вандализам“ во Охрид, организирана по повод Меѓународниот ден на младите – 12 Август.

— реклама —

Јаневска нагласи дека превенцијата е еден од клучните начини за справување со проблемот. Со законските измени од минатата година, училиштата се задолжени во годишните програми да предвидуваат активности за добросостојба на учениците, заштита од насилство, спречување дискриминација и подобрување на комуникацијата.

Се зајакнуваат и стручните служби во училиштата, а повторно се воведени дежурствата на наставниците за време на одморите во ходниците и училишните дворови.

— реклама —

Во соработка со „Телеком“ и УНИЦЕФ е изработен прирачник за справување со сајбер-булингот, додека со „Макпетрол“ е подготвен прирачник за врсничко насилство, заснован на реални ситуации. МОН, исто така, со Коалицијата на младински организации – СЕГА работи на национални стандарди за безбедни училишта.

— реклама —

Министерката посочи дека анализите упатуваат оти семејното насилство и недоволната грижа за децата во дел од семејствата се меѓу причините за врсничкото насилство. Затоа, со МВР, Министерството за социјална политика, демографија и млади и Комората на психолози се работи на унапредување на знаењата на училишните психолози и наставниците за препознавање семејно насилство и занемарување.

Досега се реализирани директни средби со наставници и родители во околу 30 општини, а активностите ќе продолжат.

Јаневска информираше и дека во собраниска процедура се законски измени со кои се предвидуваат парични казни за родители и старатели на ученици за кои ќе се утврди дека извршиле врсничко насилство, како и за родители кои одбиваат соработка со училиштата.

„Укажувајте, спречувајте обиди за булинг, пријавувајте насилство, бидете емпатични, заштитете ги послабите и помогнете им на оние на кои им е потребна помош“, порача Јаневска.