Александар Наунов, татко на загинатата Надица Наунова во трагедијата во дискотеката „Пулс“, остро реагираше на однесувањето во судницата, откако родител кој реагирал на изјава на адвокат бил исклучен од рочиштето, додека, како што рече, адвокатите на обвинетите не биле санкционирани иако дофрлале и зборувале без дозвола на судијката.
Наунов посочи дека еден од адвокатите на обвинетите дал коментар за снимка која е презентирана како доказ, на која се гледал повреден млад човек.
„Се гледа како еден од најповредените, излегува од дискотеката, еден од адвокатите на обвинетите рече дека ‘еве како имало 700 степени, гледај го дечкото како го шета дека е на пазар’“, рече Наунов.
Тој додаде дека поради таквата изјава реагирал еден од родителите, по што бил отстранет од судницата.
„И затоа еден од нашите... затоа еден од родителите изреагира и го исфрлија од судница“, кажа тој.
Според Наунов, во судницата постојано има дофрлања, но без последици за адвокатите.
„А сега гледаме и вие исто гледате дека се надвикуваат од сите страни, кој од лево, кој од десно, само да се исклучи вниманието на обвинителство и ние да кренеме паника и тензија за пак да не исфрлат. А нив не ги исфрлаат ни ништо, не ги казнуваат“, рече Наунов.
Тој направи споредба и со рочиштата за предметите на ОЈО ГОКК каде се гонат полициски службеници кои постапувале во „Пулс“.
„Во претходното рочиште кај што бевме, кај ОЈО-ГОКК, таму не даваат ништо. Прва опомена, втора, трета, и исклучување или парична казна“, изјави Наунов.
На крајот порача дека родителите повеќе не можат да трпат таков однос.
„Значи очекувам и тука више да биде така, бидејќи не се трпат више никој, газат врз нас, врз нашите 60 мртви деца и 218 повредени. Ова е више не се трпи“, рече Наунов.
