На денешната прес-конференција, претседателот на Општинската организација на СДСМ во Карпош, Панче Милевски Панта, побара одговори за отсуството на градоначалникот на Општина Карпош, Сотир Лукровски, оценувајќи дека општината се соочува со институционален вакуум и дека единствено демократско решение се предвремени локални избори.
На прес-конференција, Панче Милевски Панта, праша каде се наоѓа Лукровски и кој во моментов ја раководи општината.
„Еден месец го нема градоначалникот, а нема ниту официјален одговор. Карпошани имаат право да знаат до кога ќе трае неговото отсуство, кој ги носи одлуките и дали е точно дека е поднесена оставка“, рече Милевски.
Тој обвини дека граѓаните се соочуваат со влошени јавни услуги и нерешени комунални проблеми, додавајќи дека и додека Лукровски формално ја извршувал функцијата не биле видливи конкретни резултати од неговото работење.
Милевски се осврна и на денешното отворање на базенот во Карпош, посочувајќи дека на настанот присуствувал премиерот Христијан Мицкоски, но не и градоначалникот.
„Карпош не смее да биде заложник на лични пресметки и институционален вакуум. Ако општината не може нормално да функционира, тогаш единственото демократско решение се предвремени локални избори, на кои граѓаните повторно ќе одлучат кому ќе му ја доверат одговорноста да го води Карпош“, порача Милевски.
Од СДСМ велат дека граѓаните заслужуваат транспарентност и јасни одговори за состојбите во Општина Карпош, како и информации за нејзиното тековно функционирање и финансиска стабилност.
