Кинеското Министерство за надворешни работи денеска ја повика Јапонија да ги почитува ставовите на своите граѓани, да ги исполни меѓународните обврски и да се откаже од, како што наведе, „играњето со огнот“ кога станува збор за нуклеарното оружје.
Портпаролот на министерството, Лин Џијан, изјави дека јапонските власти треба да ја почитуваат волјата на граѓаните и да останат доследни на принципите според кои земјата не произведува, не поседува и не дозволува распоредување нуклеарно оружје на својата територија.
Изјавата следува по анкета на Јапонското здружение за истражување на јавното мислење, според која 76 отсто од испитаниците ги поддржуваат трите ненуклеарни принципи на Јапонија, а 77 отсто се против воведување модел на „нуклеарна поделба“, кој би овозможил САД да распоредат нуклеарно оружје во земјата.
Во меѓувреме, јапонската влада неодамна го објави годишниот извештај за одбраната, во кој се наведува дека земјата мора да се прилагоди на новите облици на војување и да ја зајакне сопствената одбранбена индустрија. Во документот, Кина е означена како најголем стратешки предизвик за Јапонија.
