„Не трчам на 100 метри, туку маратон“ – Мицкоски за преговорите, притисоците и Бугарија

Премиерот Христијан Мицкоски, на свечената академија по повод 23 Октомври – Денот на македонската револуционерна борба, упати остри критики кон Бугарија, предупреди на можни обиди за дестабилизација на Македонија и обвини дел од опозицијата дека за пари и ветувања за функции би можел да учествува во политички провокации.

Во своето обраќање, Мицкоски оцени дека Македонија го минува најдолгиот и најтешкиот пат кон Европската Унија, проследен со бројни условувања, одложувања и, како што рече, неправедни удари.

„Големите го прават тоа што сакаат, а малите тоа што мораат. И ова не е флоскула од учебниците, туку извадок од реалната политика денес“, изјави премиерот, додавајќи дека државата мора да постапува мудро и трпеливо.

Тој ја обвини Бугарија дека по приемот во Европската Унија почнала да ги користи европските механизми за блокирање на македонските евроинтеграции. Според него, пред членството во ЕУ, источниот сосед не ги поставувал прашањата за Бугарите во македонскиот Устав и за историските личности на начинот на кој ги поставува денес.

„Нашиот источен сосед сè до нејзиниот влез немаше ниту една забелешка за добрососедските односи. Сè дотогаш не се интересираше за Бугарите, за кои таа тврди дека е многу важно да бидат дел од нашиот Устав“, рече Мицкоски.

— реклама —

И покрај овие критики, премиерот нагласи дека напуштањето на преговорите со ЕУ не е решение, бидејќи членството би ѝ овозможило на Македонија рамноправно да учествува во носењето европски одлуки.

„Честопати ни велат: ‘Напушти ги преговорите!’ Лесно е да се каже, но така ја отфрламе единствената шанса да влеземе во клубот и да разговараме рамноправно на истата маса“, порача тој.

Мицкоски упати порака и до оние за кои смета дека се обидуваат да ја оспорат македонската историја.

„А оние кои се шнајдери на историјата, што мислат дека со вето можат да ни ја прекројат историјата, им порачувам: нашето паметење не подлежи на нивно одобрување. Ниту еден притисок не може да го избрише Гоце Делчев од срцето на македонскиот народ“, истакна премиерот.

— реклама —

Осврнувајќи се на безбедносните состојби во регионот, Мицкоски предупреди дека нестабилноста во Европа и на Балканот може да создаде дополнителни ризици за Македонија.

„Веќе Балканот не е единственото буре барут. Впрочем, Европа станува немирен вулкан. Сè помалку се слуша разумот, а секојдневно ги гледаме и протестите и насилството од разни облици присутни во Европа и кај нашите соседи“, рече тој.

Премиерот посебно ги спомена активностите на безбедносните служби на Балканот, изразувајќи сомневање дека одредени структури би можеле да се обидат да ја вовлечат Македонија во регионални проблеми.

„А на Балканот службите никогаш не престануваат да работат. И нема да ме зачуди доколку има и такви кои ќе се обидат да нè вмешаат во нивните проблеми или да префрлат дел од нивниот амбиент во нашето секојдневие“, изјави Мицкоски.

Во тој контекст, тој обвини и неименувани претставници на опозицијата.

— реклама —

„Има неколку од опозицијата, што за пари и лажни ветувања за фотелја чуда умеат да прават“, рече премиерот, без да посочи конкретни имиња или докази за ваквите тврдења.

Тој повика граѓаните да не подлегнуваат на провокации и на, како што ги нарече, вештачки наметнати прашања и хиперболизирани етнички теми.

Во делот од говорот посветен на животниот стандард, Мицкоски призна дека голем број граѓани се соочуваат со финансиски тешкотии и неизвесност.

„Знам дека има граѓани кои се уморни од ветувања. Знам дека има луѓе кои работат чесно, а на крајот од месецот повторно пресметуваат што можат да платат и што мора да одложат“, изјави премиерот.

Тој зборуваше и за загриженоста на родителите дека нивните деца, и покрај постигнатиот успех, ќе ја напуштат Македонија во потрага по подобра иднина.

Осврнувајќи се на работата на Владата, Мицкоски истакна дека се градат шест автопатски делници, два гасоводи и еден далекувод, дека се инвестира во студентски домови и образовна инфраструктура и дека за општините се издвоени повеќе од половина милијарда евра за над 1.200 проекти. Тој тврдеше и дека Македонија има најниска инфлација во Европа и регионот.

На крајот од обраќањето, премиерот порача дека вистинската вредност на слободата се гледа во животот на граѓаните, еднаквоста пред законот и можноста младите да ја градат својата иднина во сопствената држава.

„Слободата добива целосна смисла кога граѓанинот може слободно да зборува, чесно да заработува и спокојно да го планира животот. Кога законот важи еднакво за влијателниот и за обичниот човек. Кога партиската книшка ја губи моќта пред знаењето, трудот и способноста“, рече Мицкоски.

Тој го заврши говорот со порака дека денешните генерации имаат обврска да изградат посилна и поправедна држава за своите деца, нагласувајќи дека тоа е најголемата одговорност кон македонските револуционери.