Недостигаат речиси осум тони сув цвет од медицински канабис во фирма за одгледување во Борисово

Недостиг од речиси осум тони сув цвет од медицински канабис е утврден при контрола во правно лице за одгледување медицински канабис во селото Борисово, општина Ново Село. Поради констатираните неправилности, СВР Струмица поднесе кривични пријави против правното лице и неговиот управител.

— реклама —

— реклама —

При контролата, спроведена од полициски службеници и претставници на надлежната комисија при Министерството за здравство, биле утврдени недостиг на документација за ангажираниот кадар, недостиг на друга задолжителна документација и непокриена количина од 7.813,49 килограми сув цвет од медицински канабис.

— реклама —

Според МВР, за наведената количина правното лице не располагало со соодветна документација. Кривичните пријави се поднесени против фирмата и нејзиниот управител В. К., поради сомнение за сторени кривични дела според член 95-в од Законот за контрола на опојни дроги и психотропни супстанции.