Неизвесни избори во Бугарија, води актуелната претседателка

Актуелната претседателка на Бугарија, Илијана Јотова, има мала предност пред поранешниот привремен премиер, Андреј Ѓуров, во првиот круг од претседателските избори, покажуваат излезните анкети.

Според процените, Јотова освоила меѓу 35 и 36,5 отсто од гласовите, додека Ѓуров добил меѓу 32,2 и 32,5 отсто. Разликата е помала од онаа што ја предвидувале предизборните анкети, според кои Јотова требало да освои повеќе од 40 отсто, а Ѓуров нешто над 28 отсто.

— реклама —

Доколку овие процени се потврдат со официјалните резултати, двајцата кандидати ќе се соочат во вториот круг на 1 ноември. На изборите учествувале вкупно 27 кандидати.

— реклама —

Јотова се залага за дијалог со Москва, додека Ѓуров ја има поддршката на прозападната опозиција. Иако претседателската функција во Бугарија е главно церемонијална, изборите добија дополнителна важност по серијата напади со беспилотни летала врз трговски бродови во близина на бугарскиот брег на Црното Море, во кои загинале дваесетина морнари од различни земји.

Нападите предизвикале осуди од меѓународната заедница и загриженост поради ширењето на руско-украинската војна. Бугарската влада побарала помош од сојузниците во НАТО за зајакнување на поморската безбедност. Двајцата водечки кандидати ги осудиле нападите.

— реклама —

Ѓуров, кој годинава привремено ја извршувал премиерската функција, има поддршка од прозападните реформски партии. Тој отворено ја поддржува Украина, а како премиер потпишал договор за безбедносна соработка со Киев.

Јотова претходно била потпретседателка на Бугарија, а претседателската функција ја презеде во јануари, откако Румен Радев поднесе оставка за да учествува на парламентарните избори. Радев победи на тие избори, а политичките аналитичари го сметаат за политичар близок до Кремљ.