Нема „офанзивни“ мерки за цените на маркетите, Мицкоски најави дека ќе разговара за да не ги покачуваат производите

Владата засега не донесе нови мерки за спречување евентуални поскапувања на производите во маркетите, иако цените на горивата значително се зголемија по ескалацијата на конфликтот меѓу Соединетите Американски Држави и Израел од една страна и Иран од друга.

— реклама —

Премиерот Христијан Мицкоски изјави дека ќе разговара со трговците и ги повика да не ја користат актуелната состојба за дополнително зголемување на цените и за префрлање на притисокот врз потрошувачката кошница на граѓаните.

— реклама —

„Сакам и со нив да поразговарам, да не се користи сега овој притисок веднаш да се зголемат цените и притисокот да се префрли врз потрошувачката кошница на граѓаните, за да не мораме ние како влада да преземаме друг тип на, би рекол, офанзивни мерки“, изјави Мицкоски.

Тој нагласи дека Комисијата за заштита на конкуренцијата и Државниот пазарен инспекторат ќе го следат однесувањето на трговците, како на малопродажниот, така и на големопродажниот пазар.

— реклама —

„Врз основа на нивното однесување, така и Владата ќе се однесува. Очекуваме тие да имаат фер однос кон граѓаните, за и ние како влада да бидеме фер кон нив, односно заеднички во овие моменти да го заштитиме стандардот на граѓаните, бидејќи тоа е наша цел и приоритет“, рече премиерот.

— реклама —

Тој додаде дека институциите внимателно ќе ја следат состојбата на пазарот и дека Владата ќе реагира доколку се утврдат злоупотреби или неоправдани поскапувања.