Израелскиот премиер Бенјамин Нетанјаху наредил отстранување на неовластените доселенички пунктови на Западниот Брег, потврдиле два извора запознаени со ситуацијата, објави „Ројтерс“.
Налогот се однесува на објекти што доселениците ги изградиле без официјално одобрение од израелските власти, најчесто мали групи монтажни куќи. Израел и претходно повремено отстранувал вакви објекти, но дел од нив подоцна биле легализирани и добиле пристап до државно финансирање. Засега не е познато кога точно ќе започне нивното отстранување.
Според изворите, одлуката на Нетанјаху следува по притисокот од САД, кои бараат од Израел да преземе поостри мерки против насилството на доселениците врз Палестинците.
Американскиот амбасадор во Израел, Мајк Хакаби, во саботата остро ги осуди насилните доселеници, нарекувајќи ги терористи. Тој порача дека лицата кои вршат такви дејствија мора да се соочат со сериозни последици.
Израелскиот портал „Ynet“ претходно објави дека наредбата се однесува на околу сто доселенички пунктови. Канцеларијата на премиерот и израелската војска засега не ги коментираа овие информации.
Министерот за финансии Безалел Смотрич делумно ја потврдил информацијата, наведувајќи дека Нетанјаху дал „упатство за евакуација на локациите изградени во зоните А и Б“. Смотрич, кој и самиот е доселеник и е задолжен за прашања поврзани со изградбата на доселенички населби, рекол дека не се согласува со одлуката на премиерот.
Според организацијата „Peace Now“, на Западниот Брег има 340 неовластени доселенички пунктови и 146 населби официјално одобрени од израелската влада.
Обединетите нации и повеќето држави во светот ги сметаат израелските населби на Западниот Брег за незаконски според меѓународното право. Израел, пак, го оспорува таквиот став и територијата ја смета за спорна.
