Израелскиот премиер Бенјамин Нетанјаху го повика Вашингтон да не ѝ продава напредно вооружување на Турција, особено борбените авиони Ф-35, во пресрет на патувањето на американскиот претседател Доналд Трамп на Самитот на НАТО во Турција.
Во интервју за „Фокс њуз“, Нетанјаху ја нарече Турција „режим заразен со Муслиманското братство“ и оцени дека не треба да добие ниту авиони Ф-35, ниту мотори за борбени авиони.
„Мислам дека не треба да им се даваат Ф-35, ниту мотори за нивните борбени авиони“, изјави израелскиот премиер.
Минатиот месец Трамп најави дека би можел да ја одобри продажбата на моторите Ф110 на Турција и повторно да ја вклучи земјата во програмата за Ф-35.
Турција ги бара овие мотори за развој на својот борбен авион од петта генерација KAAN, чиј развој започна откако во 2019 година беше исклучена од програмата Ф-35 поради набавката на рускиот противракетен систем С-400.
Нетанјаху предупреди дека таков потег би ја нарушил рамнотежата на силите на Блискиот Исток, која, според него, се темели на воздушната надмоќ на Израел и американското присуство во регионот.
Тој го критикуваше и турскиот претседател Реџеп Таип Ердоган, обвинувајќи го дека отворено му се заканува на Израел.
Според американските медиуми, администрацијата на Трамп веќе го известила Конгресот за намерата да ѝ продаде на Турција мотори за борбени авиони во вредност поголема од 700 милиони долари. Сепак, за евентуалното враќање на Турција во програмата Ф-35 ќе биде потребно да се исполнат условите предвидени со американскиот закон.
Во интервјуто, Нетанјаху порача и дека и покрај повремените несогласувања, Израел и САД остануваат блиски сојузници и изрази надеж за напредок во мировните напори со Либан.
