Израелскиот премиер Бенјамин Нетанјаху изјави дека Израел не го прифаќа предлогот на Одборот за мир за Газа, поддржан од САД, нагласувајќи дека единствениот услов за какво било повлекување е целосно разоружување на Хамас.
Во видео објавено на Фејсбук, Нетанјаху рече дека тимот на американскиот претседател Доналд Трамп смета дека може да обезбеди разоружување на Хамас и демилитаризација на Појасот Газа, но дека израелската страна не се согласила со доставениот нацрт.
„Го разгледавме предлогот, но тоа не беше наш текст. Ги вративме нашите забелешки“, изјави Нетанјаху.
Тој повтори дека израелската армија нема да се повлече од сегашните позиции во Газа сè додека Хамас не биде целосно разоружан. Овој став се разликува од предлогот, кој предвидува Израел постепено да се повлече кон т.н. Жолта линија, додека Хамас започне со предавање на оружјето.
Американски претставник минатата недела изјави дека предлогот е дел од мировниот план на Доналд Трамп за ставање крај на војната во Газа, кој Израел претходно начелно го прифатил.
