Неверојатна глетка во Јадранот: Изронил кит тежок до 70 тони кај хрватски остров

Вистинска сензација предизвика појавата на огромен кит во Јадранското Море, откако кај островчето Блитвеница, југозападно од Жирје, во Хрватска, бил забележан еден од најголемите морски цицачи на планетата.

— реклама —

Станува збор за кит перкар (Balaenoptera physalus), второто најголемо животно во светот, веднаш по синиот кит. Возрасните единки можат да достигнат должина поголема од 20 метри и тежина до 70 тони.

— реклама —

Иако ваквата глетка за многумина изгледа несекојдневно, експертите велат дека овој вид не е редок посетител на Јадранот. Биологот и виш кустос во Хрватскиот природонаучен музеј, Драшко Холцер, објаснува дека китовите перкари сезонски навлегуваат во Јадранското Море, најчесто во текот на пролетта и летото, во потрага по храна.

— реклама —

Главната причина за нивното доаѓање е зголемената концентрација на планктон и крил – ситни морски организми со кои се хранат, особено во подрачјето на Јабучката Котлина и јужниот дел на Јадранот.

— реклама —

Иако најчесто престојуваат во подлабоките и отворени морски области, нивното присуство обично останува незабележано за пошироката јавност. Сепак, рибарите и екипажите на бродовите повремено имаат можност да сведочат на вакви спектакуларни средби со морските џинови.