Словенија се соочи со силно невреме, проследено со поројни дождови, грмотевици, силен ветер и град, при што најголеми штети беа пријавени во источните делови на земјата и во регионот околу Марибор.
Според словенечките медиуми, ветерот на повеќе места откорнувал покриви, уривал дрвја и електрични столбови, додека пожарникарските служби интервенирале на бројни локации. Оштетувања биле регистрирани и на објекти, меѓу кои и на зградата на Универзитетскиот клинички центар во Марибор.
Градот на одредени места достигнувал големина на орев, а Словенечката агенција за животна средина – АРСО претходно го подигнала нивото на предупредување од жолто на портокалово поради опасност од силни грмотевични процеси, поројни врнежи и силни налети на ветер.
Невремето најпрво ги погодило северните и источните региони на Словенија, а потоа се придвижило кон централниот и југоисточниот дел од земјата. Врнежи и силен ветер биле забележани и во Љубљана, додека на аеродромот во близина на главниот град биле измерени засилени удари на ветер.
Надлежните служби предупредија дека и по поминувањето на главниот бран постои можност за локални поројни дождови и засилени ветрови. Засега не се очекуваат поголеми поплави, но во делови каде што дождот ќе продолжи, можно е зголемување на водостоите.
Невремето ја зафати и Хрватска. Во Загреб биле регистрирани силни грмежи, дожд и ветер, а хрватските метеоролози издадоа жолто предупредување за поголем дел од внатрешноста на земјата.
