Мајката на Нина Димитриевска денеска повторно се обрати до јавноста со итен апел за помош, откривајќи дека нејзината ќерка секојдневно се соочува со големи болки и дека семејството има многу малку време за да ги обезбеди средствата потребни за операцијата.
Според семејството, досега е собрана половина од потребната сума, но за операцијата недостигаат уште 100.000 евра. Средствата мора да бидат обезбедени во рок од две недели за да може да се закаже интервенцијата.
Мајката раскажува дека во Америка биле направени испитувања со кои лекарите го утврдиле изворот на болката, а Нина таму веќе била подложена на една операција.
„Гневот ми ја кине душата за сето она што ни го приредија, но благодарение на лекарите во Америка барем добивме јасна слика. Таму ги извршивме сите испитувања, точно го лоциравме изворот на болката. Во Америка веќе извршивме една успешна операција со која се ослободија засегнатите нозе, а лекарите беа постојано до нас, деноноќно на линија за секој проблем“, наведува таа.
Според нејзините зборови, лекарите предупредиле дека главната операција не треба да се одложува поради ризик од дополнителни компликации.
„Ако не реагираме веднаш со оваа операција, лекарите предупредуваат на сериозни компликации и појава на артритис, што трајно ќе ѝ ја наруши иднината. Но, моравме да се вратиме дома бидејќи останавме без никакви финансиски средства за да ја направиме главната операција за решавање на болката“, пишува мајката.
Таа вели дека состојбата на Нина по враќањето дома е тешка и дека семејството постојано е по болници.
„Откако се вративме, Нина воопшто не е добро. Покрај секојдневните болки, таа е постојано со настинки и ние буквално не излегуваме од болници. Ситуацијата е алармантна!“
За да може да биде закажан терминот за операцијата, семејството најпрво мора да ја обезбеди потребната сума, поради што мајката повторно бара помош од граѓаните, компаниите, здруженијата и сите кои имаат можност да донираат.
„Ве молам од сè срце, подајте ни рака. Ситуацијата е критична. Донирајте уште денес за итно да ги собереме овие 100.000 евра и помогнете ѝ на мојата Нина да се врати во нормална состојба пред да биде предоцна“, стои во апелот.
Семејството упатува благодарност до сите кои досега донирале, организирале хуманитарни активности или го споделиле апелот, но нагласува дека сега секој ден е важен.
За Нина може да се донира преку телефонските броеви:
Телеком: 143 193
ВИП: 143 473
Донации може да се уплатат и на сметките:
Шпаркасе банка: 250500021369574
НЛБ банка: 210501724202015
IBAN: MK07250080008236959
SWIFT: INSBMK22
