Ништо од ветениот економски бум: Растот во САД далеку од најавите на Трамп

Американскиот портал „Аксиос“ објави анализа во која оценува дека актуелните економски показатели не ги потврдуваат големите ветувања на администрацијата на американскиот претседател Доналд Трамп за ново „златно доба“ и економски раст од пет до шест проценти.

Според анализата, американската економија и понатаму покажува отпорност благодарение на личната потрошувачка и инвестициите во вештачката интелигенција, но растот останува значително под најавите на Белата куќа.

— реклама —

Во вториот квартал економијата на САД пораснала со годишна стапка од 1,5 отсто, по растот од 2,1 отсто во првиот квартал. Иако овие резултати се оценуваат како стабилни, тие се далеку под амбициозните прогнози на администрацијата.

— реклама —

Економистите посочуваат дека за раст од пет до шест проценти би бил потребен исклучително силен пораст на продуктивноста, што во моментов не се забележува во економските показатели.

Конгресната буџетска канцеларија проценува дека долгорочниот потенцијален раст на американската економија во следната деценија ќе изнесува околу два проценти годишно.

— реклама —

Во анализата се наведува дека неизвесноста околу царините, инфлацијата и геополитичките тензии придонеле за забавување на економскиот раст. Сепак, потрошувачката на домаќинствата и инвестициите на компаниите остануваат силни, што администрацијата на Трамп го посочува како доказ за стабилноста на економијата.

Во меѓувреме, анкетата на „Ројтерс“ и „Ипсос“ покажува дека Американците првпат по речиси една деценија имаат поголема доверба во демократите отколку во републиканците кога станува збор за економските прашања.

Од Белата куќа, пак, тврдат дека најновите економски податоци ја потврдуваат отпорноста на американската економија и продолжувањето на индустриското закрепнување, додека критичарите сметаат дека најавениот економски бум засега не е реализиран.