„Ниту ПИОМ е пред колапс, ниту пензиите се во ризик, единствено СДС е загрозен од опстанок на политичката сцена“, вели ВМРО-ДПМНЕ

ВМРО-ДПМНЕ преку соопштение реагира на прес-конференцијата на пратеничката и потпретседателка на СДСМ, Јованка Тренчевска, во врска со состојбата во Фондот за пензиското и инвалидското осигурување (ПИОМ).

Од владејачката партија ги отфрлаат тврдењата дека ПИОМ е пред колапс и дека исплатата на пензиите е загрозена. Според ВМРО-ДПМНЕ, Пензискиот фонд е стабилен, а пензиите редовно и навремено се исплаќаат.

— реклама —

„Ниту ПИОМ е пред колапс, ниту пензиите се загрозени“, наведуваат од партијата, оценувајќи дека СДС со своите настапи создава страв и паника кај граѓаните.

Од ВМРО-ДПМНЕ посочуваат дека пензионерите веќе две години по ред добиваат линеарно зголемување на пензиите од 7.000 денари.

— реклама —

Партијата оценува дека со актуелната владина политика пензионерите добиле повисоки пензии и можност за, како што наведуваат, подостоинствен живот.

— реклама —

Во реакцијата ВМРО-ДПМНЕ се осврнува и на периодот кога СДС беше на власт, посочувајќи ја Тренчевска, која тогаш беше министерка за труд и социјална политика. Од партијата тврдат дека во тој период зголемувањата на пензиите биле значително помали и дека пензионерите протестирале барајќи повисоки примања.

ВМРО-ДПМНЕ ја обвинува Тренчевска дека сега критикува зголемување на пензиите, иако, според нив, СДС претходно се спротивставувал на актуелниот модел на зголемување.

Од партијата додаваат дека за време на мандатите на СДС просечното месечно зголемување на пензиите било околу 90 денари.

Во завршницата на реакцијата, ВМРО-ДПМНЕ го обвинува СДС дека создава „апокалиптични сценарија“ за состојбата во ПИОМ и оценува дека наместо за Пензискиот фонд, партијата треба да се грижи за сопствената политичка состојба.