Ниту во џебовите, ниту во ранците: Англија воведува целосна забрана за телефоните во училиштата

Англија планира целосно да го забрани присуството на мобилни телефони во текот на училишниот ден, вклучително и нивното чување во џебовите или училишните ранци на учениците. Построгите правила треба да почнат да се применуваат од септември 2027 година, со цел да се подобрат концентрацијата, успехот и меѓусебната комуникација меѓу учениците.

Според новите насоки на британската влада, телефоните нема да смеат да се користат во ниту еден дел од училишниот ден. Досега некои училишта применуваа правило според кое уредите не смееле да се гледаат ниту да се слушаат, но можеле да останат во училишните ранци доколку не се користат.

— реклама —

Правно обврзувачките насоки стапија во сила во јуни, со што училиштата во Англија добија обврска да спречат користење мобилни телефони во текот на наставниот ден. Со најавените измени, ограничувањата дополнително ќе се заострат.

— реклама —

Министерката за образование Луси Пауел порача дека училиштата треба да бидат места за стекнување знаење и создавање пријателства, а не за постојано користење мобилни уреди и прелистување содржини.

Училиштата ќе можат самостојно да одлучуваат како ќе ја спроведуваат забраната. Некои веќе набавиле специјални футроли што се заклучуваат и безбедни шкафчиња, додека други ги собираат телефоните на почетокот на наставата или целосно забрануваат нивно внесување во училишните простории.

— реклама —

Меѓу училиштата што вовеле построги мерки е и Академијата за момчиња „Берниџ“ во Манчестер. Нејзиниот директор Карл Харисон изјавил дека училиштето вложило 20.000 фунти, односно околу 23.000 евра, во систем со метални детектори и специјални футроли за ограничување на пристапот до телефоните.

— реклама —

Според Харисон, иако дел од учениците првично сметале дека со новите правила им се ограничува слободата, резултатите биле позитивни. Учениците почнале повеќе да комуницираат меѓу себе, концентрацијата за време на часовите се подобрила, а бил забележан и напредок во училишните резултати.

Сепак, здруженијата и синдикатите на училишните раководители предупредуваат дека спроведувањето на построгите ограничувања може да претставува предизвик доколку владата не обезбеди дополнителна финансиска поддршка.