Варено јајце, компир, шрафцигер и Лего коцки меѓу необичните предмети отстранети од пациентите во англиските болници

Англиските болници во текот на 2022 година имале повеќе од 1.500 посети на итните одделенија поради предмети заглавени во ректумот на пациентите. Меѓу предметите што медицинските екипи морале да ги отстрануваат имало електронски цигари, Лего коцки, далечински управувачи, играчки, па дури и рачка од четка за тоалет, објави агенцијата ДПА.

Податоците биле откриени откако новинската агенција „Прес асошиејшн“ испратила повеќе од 100 барања за пристап до информации до болници низ Англија, барајќи податоци за случаи на странски тела во ректумот во 2022 година.

— реклама —

Медицинските екипи во болниците во Левишам и Гринич, во јужниот дел на Лондон, отстранувале Лего коцки ставени во балони, шишиња пиво и шампон, четка за заби, па дури и рачка од врата. Болниците во Бирмингем, пак, забележале повеќе посети за отстранување предмети како мобилни телефони и закачалки за облека.

— реклама —

Во грофовијата Беркшир, лекарите отстранувале куршум од играчка „Нерф“, варено јајце, лименка „Кока-Кола“, компир, шишенце дезодоранс и рачка од четка за тоалет. Меѓу предметите имало и краставици, тиквички, грозје и јаболко.

Списокот вклучувал и далечински управувачи за телевизори, детски играчки, мешалка за коктели, банкарска картичка, метални завртки, пинцети, жилети, игла за плетење, ножеви, спојувалки и шрафцигер. Меѓу пронајдените предмети биле и гранка, свеќа и чоколадно јајце „Киндер“.

— реклама —

Според податоците што ги анализирала „Прес асошиејшн“, во 2022 година повеќе од 1.500 луѓе побарале помош во одделенијата за итна медицинска помош поради „странско тело во ректумот“.

Крис Нордстром, лекар во одделението за итна медицинска помош во болницата „Нортвик парк“, во северозападен Лондон, изјавил дека ваквите случаи се релативно ретки, но дека при нивното појавување најважно е да се обезбеди безбедна и сочувствителна медицинска грижа, без осудување на пациентите.

Тој додал дека секој што ќе се соочи со ваков проблем треба веднаш да побара медицинска помош, наместо да ризикува дополнителни повреди.