Земјотрес со јачина од 3 степени според Рихтер е регистриран рано утринава во Србија, во подрачјето на Нови Пазар, соопшти Републичкиот сеизмолошки завод на Србија.
Според податоците на заводот, потресот бил регистриран во 1:19 часот по локално време, а епицентарот бил на длабочина од само два километри, во близина на Нови Пазар.
Поради малата длабочина, потресот бил почувствуван во повеќе делови од градот, а дел од жителите излегле на терасите и пред домовите. Според сведоштва објавени во српските медиуми, тресењето било краткотрајно, но доволно силно за да ги разбуди некои жители.
Засега нема информации за повредени лица или за материјална штета. Сеизмолошкиот завод напоменува дека податоците се прелиминарни и може да бидат дополнително коригирани по деталната обработка.
