Во Осло денеска беше одржана државната погребна церемонија за норвешкиот крал Харалд V, со што заврши и 13-дневниот официјален период на жалост по неговата смрт на 28 август, на 89-годишна возраст.
Ковчегот на кралот беше поставен на артилериска лафета, покриен со црвеното кралско знаме на Норвешка и украсен со бело цвеќе. Погребната поворка се движеше по главната улица во Осло, од кралската палата до катедралата, додека од тврдината Акерсхус беа испукани 21 почесен топовски плотун.
Зад ковчегот пеш одеа наследникот на Харалд, кралот Хакон VIII, и другите членови на кралското семејство. Вдовицата на Харалд, кралицата Соња, како и сопругата на Хакон, кралицата Мете-Марит, поворката ја следеа со автомобил.
На црковната церемонија присуствуваа членови на повеќе европски кралски семејства, меѓу кои британскиот принц Вилијам и принцезата Ана, шпанскиот крал Фелипе и кралицата Летиција, шведскиот и данскиот кралски двор, како и холандскиот крал Вилем-Александар и кралицата Максима. Присуствуваше и јапонскиот престолонаследник Акишино, како и официјални претставници од повеќе од 20 земји.
На државниот погреб присуствуваше и министерот за надворешни работи на Србија во технички мандат, Марко Ѓуриќ.
Норвешкиот премиер Јонас Гар Стeре во говорот го опиша Харалд како крал кој умеел да најде рамнотежа меѓу достоинството и непосредноста. Тој истакна дека Харалд ја направил Норвешка „поголема“ и се залагал за општество во кое сите имаат свое место.
По церемонијата, четири борбени авиони Ф-35 прелетаа над катедралата. Еден од авионите се одвои од формацијата, симболично претставувајќи ја смртта на кралот.
Ковчегот потоа беше пренесен до тврдината Акерсхус, каде што во приватна церемонија беше положен во кралската крипта, покрај неговите родители и бабата и дедото.
Повеќе од 46.000 Норвежани во текот на изминатата недела поминале покрај ковчегот за да му оддадат последна почит на кралот. По погребната церемонија, новиот крал Хакон и членовите на кралското семејство се појавија на балконот на кралската палата и ги поздравија насобраните граѓани.
Знамето над кралската палата повторно беше подигнато, со што и официјално заврши периодот на жалост.
