Норвешка од новата учебна година ќе воведе речиси целосна забрана за користење алатки базирани на вештачка интелигенција за учениците во основното образование, со цел да се спречи негативното влијание врз учењето и развојот на децата.
Одлуката ја соопшти премиерот Јонас Гар Сторе, кој истакна дека користењето на вештачка интелигенција може да доведе до прескокнување на важни образовни процеси кај најмладите ученици.
„Најважно е децата во училиштата да научат да читаат, пишуваат и сметаат“, порача Сторе.
Според новите правила, учениците од прво до седмо одделение, на возраст од шест до 13 години, во принцип нема да смеат да користат алатки за вештачка интелигенција. За учениците од 14 до 16 години ќе биде дозволена ограничена употреба под надзор на наставниците, додека средношколците од 17 до 19 години ќе учат како правилно да ги користат овие технологии во образованието и на работното место.
Норвешката влада веќе презеде мерки за ограничување на дигиталните уреди во образованието. Во 2024 година беше воведена забрана за користење паметни телефони во училиштата поради падот на резултатите кај учениците.
Покрај тоа, владата најави и законски измени за зголемена употреба на печатени книги во наставата, со што дополнително се менува долгогодишниот тренд на дигитализација во образовниот систем.
Во април годинава Норвешка најави и план за забрана на користење социјални мрежи за лица помлади од 16 години, следејќи го примерот на Австралија и други земји кои настојуваат да ја намалат зависноста на младите од електронските уреди.
