Американските сили продолжуваат со операциите против пловни објекти за кои Вашингтон тврди дека се дел од мрежи за шверц на дрога. Во најновиот напад во Карипското Море загинале три лица, соопшти Јужната команда на американската војска.
Според соопштението, на 9 септември американската Заедничка оперативна група за западната хемисфера извршила „смртоносен кинетички напад“ врз брз пловен објект кој се движел по утврдени рути за трговија со дрога во Карипското Море.
Американската војска тврди дека имала потврдени разузнавачки информации оти пловниот објект бил активно вклучен во шверц на дрога и тројцата загинати ги опиша како „наркотерористи“.
Станува збор за најнов во серијата американски напади врз пловни објекти за кои администрацијата на претседателот Доналд Трамп тврди дека се користат за транспорт на наркотици. Според американските власти, во операциите во Карипското Море и источниот дел на Тихиот Океан од почетокот на кампањата минатата година загинале повеќе од 220 лица.
Вашингтон овие операции ги претставува како дел од борбата против организираниот шверц на дрога и криминалните мрежи што ги означува како „наркотерористички“. Во исто време, операциите предизвикаа критики од организации за човекови права и правни експерти, кои ја доведуваат во прашање законитоста на дел од нападите.
Ројтерс објави дека не можел независно да ги потврди информациите за најновиот напад. Засега не се соопштени дополнителни детали за идентитетот на загинатите или за конкретниот пловен објект.
