СДСМ преку соопштение ја обвини Владата дека не презема мерки за заштита на животниот стандард на граѓаните, оценувајќи дека најновото поскапување на горивата ќе предизвика дополнителен раст на цените.
Од партијата наведуваат дека, наместо најавеното намалување на цените на горивата, граѓаните се соочуваат со нов ценовен шок. Според СДСМ, по последните две поскапувања, цената на дизелот е повисока за повеќе од 11 денари и достигнала 94 денари за литар.
Во соопштението се оценува дека новото поскапување на горивата ќе влијае врз цените на храната, превозот и услугите, а Владата, според СДСМ, не нуди конкретни мерки за поддршка на работниците, пензионерите, земјоделците и социјално ранливите категории граѓани.
СДСМ посочува дека минималната потрошувачка кошничка повторно се доближува до 70.000 денари, а доколку се пресметаат и трошоците за изнајмување стан, месечните расходи на четиричлено семејство достигнуваат над 83.000 денари.
Од партијата оценуваат дека животниот стандард на граѓаните се влошува и ја обвинуваат Владата предводена од премиерот Христијан Мицкоски дека не успева да се справи со економските предизвици и растот на трошоците за живот.
