Нов напад на ајкула во Австралија: Тешко повреден маж, плажата затворена

Маж на возраст од околу 50 години е тешко повреден во напад на ајкула на плажата Гленфилд, северно од Џералдтон, во Западна Австралија. По нападот, тој итно бил пренесен во болница, каде што е во тешка, но стабилна состојба.

— реклама —

Инцидентот се случил утрово околу 9:45 часот по локално време, додека мажот сурфал. Според властите, ајкулата го нападнала и го каснала во близина на плажата.

— реклама —

Од местото на настанот била отстранета тешко оштетената даска за сурфање, која ќе биде испитана за да се утврди за кој вид ајкула станува збор.

— реклама —

Плажата е затворена, а жителите се повикани да го избегнуваат подрачјето. Пратеничката од Џералдтон и помошничка на министерот за рибарство, Кирили Вар, побарала од надлежните и од Владата дополнителни информации за инцидентот.

Во Западна Австралија годинава се регистрирани и два смртни напади од ајкули. Во мај, 38-годишниот Стивен Матабони од Перт загинал за време на подводен риболов кај островот Ротнест. На почетокот на јуни, 35-годишниот нуркач Даниел Турпин бил усмртен од ајкула долга 4,5 метри во близина на островот Мајклмас, кај брегот на Олбани.