Компанијата „Рајанер“ ќе го оспори тврдењето на 61-годишниот српски бизнисмен Љубиша Каровиќ дека при јулскиот инцидент на летот од Солун кон Германија главата и десната рака му биле извлечени низ скршениот прозорец на авионот.
Главниот извршен директор на авиокомпанијата, Мајкл О’Лири, изјави дека Каровиќ бил силно повлечен кон прозорецот по наглото губење на притисокот во кабината, но дека ниту еден дел од неговото тело не излегол надвор од авионот. Тој најави дека „Рајанер“ ќе го оспори тоа тврдење по завршувањето на истрагата.
Инцидентот се случи на 10 јули на летот од Солун кон Меминген, Германија. Според прелиминарните наоди на NTSB, дефект на десниот мотор довел до откачување на делови кои го пробиле трупот и го оштетиле прозорецот, по што кабината останала без притисок. Авионот се вратил и безбедно слетал во Солун, а еден патник се здобил со тешки повреди.
Каровиќ, пак, претходно раскажал дека сигурносниот појас можеби го спречил целосно да биде извлечен од авионот. Неговата сопруга Светлана опишала драматични моменти во кои, заедно со други патници, се обидувале да го повлечат назад во кабината. Според нејзиното сведоштво, еден од патниците успеал и со куфер да го затвори отворот.
И самиот Каровиќ во претходно интервју раскажал дека се онесвестувал за време на инцидентот и дека сигурносниот појас најверојатно му го спасил животот.
NTSB ја води истрагата за случајот, а конечните наоди сè уште не се објавени. Прелиминарната истрага потврди дека делови од моторот го оштетиле авионот и предизвикале губење на притисокот во кабината.
