Жителите од населбите околу цементарницата „Усје“ на 21 јануари повторно излегуваат на улица. Граѓанската иницијатива „Стоп за Усје“ најави мирна блокада во 18 часот на крстосницата меѓу булеварите „Борис Трајковски“ и „Србија“, тврдејќи дека загадувањето на воздухот и понатаму се игнорира од институциите.
Клучното барање останува поставување независни мерни станици со јавно достапни податоци во реално време, 24 часа дневно. Според иницијативата, без ваков систем граѓаните немаат можност да проверат што навистина дишат.
Од цементарницата, пак, и понатаму се повикуваат на еколошките дозволи и на постојните мониторинг-рамки. Компанијата во повеќе наврати нагласува дека работи согласно законските стандарди и дека контролите на државните институции го потврдуваат тоа.
Инаку, на седница одржана кон крајот на декември 2025, Советот на Град Скопје со 41 глас „за“ од вкупно 45 советници донесе заклучок со кој се задолжува градоначалникот Орце Ѓорѓиевски да побара од Владата да започне постапка за дислокација на цементарницата „Усје“ и други големи индустриски загадувачи надвор од скопската котлина.
Иницијативата, поднесена од советниците од „Зелен хуман град“, беше едногласно прифатена, со вкучен акцент на тоа дека Град Скопје нема директни ингеренции да ја дислоцира фабриката, но може да побара од Владата официјално да ја разгледа можноста и да започне со следење на исполнувањето на еколошките стандарди.
Советот исто така се обврза да побара од Државниот инспекторат за животна средина да спроведе низа контроли за да се утврдат фактичките емисии и дали „Усје“ ги почитува условите од своите дозволи.
Новата блокада доаѓа во момент кога институционалниот процес е отворен, но без конкретни чекори. За жителите, како што порачуваат, прашањето е едноставно – право на чист воздух пред сè друго.
