Граѓанската иницијатива „Стоп за Усје“ обвини дека цементарницата Усје бара продолжување на А-интегрираната еколошка дозвола според, како што велат, застарени стандарди за загадување кои датираат од 2014 година.
Од иницијативата тврдат дека наместо усогласување со европските стандарди и најдобрите достапни техники, компанијата бара да продолжи да работи со постојните гранични вредности за емисии.
„Во барањето нема конкретни мерки за намалување на емисиите, а предлозите на граѓанското општество се игнорирани. Со вакво барање, Усје практично бара да продолжи да ги труе скопјани со застарени стандарди кои не одговараат на европските норми“, наведуваат од „Стоп за Усје“.
Оттаму бараат Министерството за животна средина и просторно планирање да не усвои, како што оценуваат, неусогласена дозвола и најавуваат марш на 23 јуни, кој ќе започне пред Собранието и ќе заврши пред Министерството.
Од ТИТАН Усје ги отфрлаат обвинувањата и велат дека барањето за продолжување на А-интегрираната еколошка дозвола е подготвено и поднесено во целосна согласност со важечката законска регулатива.
„Апликацијата ја опишува моменталната состојба на работењето и параметрите под кои компанијата работи денес. Сите редовни и контролни мерења спроведени од Државниот инспекторат за животна средина и други акредитирани лаборатории потврдуваат усогласеност со пропишаните еколошки стандарди“, велат од компанијата.
Оттаму додаваат дека кај одредени параметри, како што се емисиите на сулфур диоксид и прашина, измерените вредности се повеќекратно пониски од законски дозволените граници.
Усје наведува и дека во рамки на Групацијата ТИТАН континуирано се инвестира во современи технологии и одржливи практики, како и во употреба на алтернативни горива, што е практика применета и во други европски цементарници на групацијата.
Компанијата порача дека останува отворена за дијалог со сите засегнати страни и дека разговорите за животната средина треба да се темелат на факти, транспарентност и точни информации.
