„Нов ребаланс затоа што нема пари за плати и пензии — следуваат нови долгови за граѓаните“, вели СДСМ

СДСМ преку соопштение реагира дека најавениот нов ребаланс на Буџетот, само два месеци по последниот, според партијата е показател за сериозни проблеми со државната каса и за неуспех на економските политики на Владата.

Од СДСМ тврдат дека буџетската дупка изнесува 900 милиони евра и дека Владата нема доволно средства за плати, пензии и тековните обврски. Според партијата, поради тоа ќе следуваат нови задолжувања.

— реклама —

Од СДСМ посочуваат дека Владата веќе се задолжила со нови 250 милиони евра за буџетските потреби до крајот на годината. Според нив, средствата не се наменети за враќање на стари кредити или за развојни инвестиции, туку за покривање на недостигот во државната каса.

— реклама —

„Тоа е резултатот од економските политики на Мицкоски: Буџет што се полни со кредити, додека граѓаните слушаат бајки за економски успеси“, наведуваат од СДСМ.

Партијата оценува дека тврдењата на премиерот Христијан Мицкоски за висок економски раст не се потврдиле и посочува на, како што наведува, раст на буџетскиот дефицит и на обврските на пензискиот систем.

— реклама —

Од СДСМ тврдат и дека со новото задолжување јавниот долг достигнува 11 милијарди евра, а заедно со долговите кон ЈПДП и другите јавни претпријатија надминува 63 отсто од БДП.

„Мицкоски го зголеми долгот за 4 милијарди евра, само за две години. Половина од вкупниот долг на државата во изминатите 30 години“, обвинува СДСМ.

Од партијата додаваат дека кредитите не претставуваат приход, туку обврска која, според нив, на крајот ќе ја плаќаат граѓаните, работниците и идните генерации.