Нов силен земјотрес го погоди Авганистан, спасувачките акции се уште траат

Авганистан синоќа повторно беше погоден од силен земјотрес, само неколку дена по разорниот потрес на истокот на земјата. Според Американскиот геолошки завод (USGS), земјотресот имал магнитуда од 5,2 и се случил во источната провинција Кунар, на длабочина од 10 километри.

— реклама —

Тресењето на тлото беше почувствувано и во главниот град Кабул, изјавил еден жител за германската агенција DPA. Засега нема информации за жртви или материјална штета.

— реклама —

Источниот дел на Авганистан во последните денови е повеќекратно погоден од силни земјотреси. Во неделата непосредно пред полноќ беше регистриран првиот потрес со магнитуда од 6 степени, по што следеа бројни афтершокови и уште еден силен земјотрес во четвртокот навечер. Според податоците на властите и на Авганистанскиот Црвен полумесечина, досега има околу 2.200 загинати и над 3.600 повредени.

— реклама —

Спасувачките акции продолжуваат, но во многу погодени региони пристапот е речиси невозможен, што ја отежнува итната помош и закрепнувањето на населението. Организацијата Human Rights Watch посочи дека строгите ограничувања за жените наметнати од талибанците дополнително ја комплицираат ситуацијата.

„Талибанците треба да обезбедат жените да бидат вклучени во сите активности за помош“, се наведува во нивното соопштение на платформата X.