Нов спор на судењето за „Пулс“: Одбраната тврди дека вештото лице читало однапред подготвени одговори

Одбраната на Јане Јанчески, обвинет во судскиот процес за трагедијата во дискотеката „Пулс“, отвори прашање за начинот на кој вештото лице Викторија Будимовска-Скаричева одговарало на денешното рочиште, тврдејќи дека пред судот читала од листови со однапред подготвен текст.

Адвокатот Јовица Страшевски, бранител на Јанчески, кој е формален сопственик на агенцијата за обезбедување „Рубикон“, тврди дека листовите од кои читала вештакот не биле составен дел од нејзиниот наод и мислење.

— реклама —

Според Страшевски, одбраната побарала судот да изврши увид во листовите и да ги обезбеди, но обвинителката Наташа Сарамандова се спротивставила на барањето, а судот не извршил увид.

„Нашето клучно прашање беше: Од каде Викторија Будимовска-Скаричева ги знаела прашањата на обвинителката Наташа Сарамандова за однапред да подготви одговори?“, прашува Страшевски.

— реклама —

Тој смета дека не станува збор за небитна процесна формалност и дека одбраната треба да има увид во материјалите што вештото лице ги користи додека дава исказ пред судот.

„Ако постојат писмени материјали од кои вештото лице чита пред судот, одбраната има право да знае што содржат тие, врз која основа се подготвени и кој ги подготвил“, вели адвокатот.

— реклама —

Страшевски оди и чекор понатаму и оценува дека случувањата на рочиштето, според одбраната, го отвораат прашањето за кредибилитетот и непристрасноста на вештото лице.

„Во судница не смее да има ‘тајни листови’. Ако нивната содржина е законита и ирелевантна за спорот – тогаш зошто судот не дозволи увид?“, прашува Страшевски.

— реклама —

Тој најавува дека одбраната на Јанчески ќе продолжи да инсистира да се утврди што содржеле листовите, како биле подготвени и дали биле поврзани со прашањата што обвинителството му ги поставувало на вештото лице.

Станува збор за тврдења и процесни забелешки на одбраната.