Нов судир на ставови меѓу Скопје и Софија: Бугарија не прифаќа посредник и бара уставни измени, а Македонија гаранции од ЕУ

Нема промена во ставот на Софија за условите за продолжување на македонските евроинтеграции, а бугарското Министерство за надворешни работи го отфрли предлогот за вклучување претставници на Европската Унија како посредници во дијалогот меѓу двете земји.

— реклама —

Бугарската министерка за надворешни работи, Весислава Петрова-Чамова, одговарајќи на пратеничко прашање, оцени дека е нетипично да има посредник меѓу земја членка на ЕУ и земја кандидат за спроведување договори усвоени на европско ниво. Таа порача дека Бугарија очекува Скопје да изгради конструктивен политички наратив и повтори дека услов за деблокирање на процесот остануваат уставните измени и внесувањето на Бугарите во Преамбулата.

— реклама —

Македонските власти, пак, остануваат на ставот дека нема да пристапат кон промена на Уставот без јасни и цврсти гаранции од ЕУ дека нема да следуваат нови билатерални пречки и дополнителни вета од Софија. Премиерот Христијан Мицкоски минатиот месец оцени дека присуството на претставници на Европската комисија е неопходно за сите аргументи да бидат слушнати објективно, бидејќи билатералните средби честопати предизвикуваат различни толкувања во јавноста.

Во меѓувреме, еврокомесарката за проширување Марта Кос потврди дека Европската комисија работи зад кулисите на подобрување на односите меѓу двете земји. Поддршка за олеснување на дијалогот и следење на владеењето на правото понуди и Швајцарија, преку претседавачот со ОБСЕ, Ињацио Касис.

— реклама —

Шефот на македонската дипломатија Тимчо Муцунски изјави дека позициите на земјава се принципиелни и добро познати кај меѓународните партнери, додавајќи дека разговорите што се водат во моментов имаат поддршка од европските институции и земјите членки.

— реклама —

Сепак, пораките од Брисел остануваат исти. За одржување на втората меѓувладина конференција и официјално отворање на преговарачките кластери, Македонија треба да ги исполни обврските од преговарачката рамка договорена во 2022 година.