Италија официјално ја известила Германија дека нема да прифаќа враќање на мигранти кои првично влегле во Европската Унија преку нејзина територија, отворајќи ново прашање околу примената на европските правила за азил.
Италијанското Министерство за внатрешни работи испратило официјален допис до германската влада со кој го одбива примопредавањето на мигранти согласно Даблинските правила, објави италијанскиот јавен сервис „РАИ њуз“.
Според Даблинскиот систем, за разгледување на барањето за азил вообичаено е одговорна земјата членка во која барателот на азил првпат влегол на територијата на Европската Унија.
Сегашниот спор се однесува на три случаи на враќање мигранти, кои датираат од периодот пред 12 јуни, кога стапи на сила новиот Пакт за миграција и азил. Рим смета дека овие лица се опфатени со таканаречената „амнестија за Даблин“, предвидена во договорот постигнат со Германија во декември минатата година.
Италијанските власти се повикуваат и на механизам за компензација, во кој се земаат предвид мигрантите што во Италија биле донесени со бродови на германски невладини организации.
Одлуката доаѓа во период на зголемени несогласувања меѓу земјите членки на ЕУ околу миграцијата. Дополнителни тензии предизвика и пристигнувањето на десетици илјади мигранти во шпанската енклава Сеута во Северна Африка кон крајот на јули.
Италија поради тоа воведе привремени контроли на воздушната и поморската граница со Шпанија, образложувајќи ја мерката со потребата од заштита на националната безбедност и европскиот систем за контрола на границите.
Италијанската премиерка Џорџа Мелони неодамна порача дека нејзината влада ќе продолжи со враќањето на нерегуларните мигранти и со зајакнувањето на контролата на границите.
