Нов удар за технолошките гиганти во Австралија: Повисоки давачки за користење медиумски содржини

Австралиската влада најави измени во програмата „News Bargaining Incentive“, со кои се зголемува надоместокот што големите технолошки компании ќе треба да го плаќаат доколку не склучат комерцијални договори со домашните медиуми за користење на нивните содржини.

— реклама —

Според новите правила, надоместокот се зголемува од 2,25 на 2,5 проценти. Воедно, тој повеќе нема да се пресметува врз основа на вкупниот приход на компаниите, туку само според приходите што ги остваруваат од дигиталното рекламирање во Австралија.

— реклама —

Помошникот на австралискиот министер за финансии, Даниел Мулино, изјави дека измената има цел да обезбеди технолошките платформи и понатаму да издвојуваат приближно ист износ за медиумите, а во иднина тие средства да растат паралелно со нивните приходи од рекламирање.

— реклама —

Новите правила ќе важат за компании што обезбедуваат значајни услуги за социјални мрежи или интернет-пребарување и остваруваат повеќе од 250 милиони австралиски долари приход. Со тоа, мерката ќе ги опфати Meta, Google, TikTok и LinkedIn, откако од предлогот е отстрането претходно планираното изземање за професионалните мрежи.

— реклама —

Средствата собрани преку овој механизам ќе бидат насочени кон медиумскиот сектор, со цел поддршка на домашното новинарство. Австралиската влада очекува новиот закон да биде доставен во парламентот до крајот на месецот.