Управата за јавни приходи го презентираше системот е-Фактура пред претставници на банкарскиот сектор, во рамки на работилница организирана во соработка со Македонската банкарска асоцијација (МБА).
На работилницата учествуваа околу 50 претставници од банкарскиот сектор, кои имаа можност да се запознаат со функционалностите и можностите на системот, како и практично да го следат процесот на креирање електронска фактура.
Од УЈП посочуваат дека вклучувањето на банкарскиот сектор е особено значајно поради неговата улога во реализацијата на електронските и безготовинските плаќања. Навременото запознавање со новите дигитални процеси треба да овозможи нивна полесна и поефикасна примена во практиката.
Работилницата е дел од активностите на УЈП за информирање и вклучување на сите релевантни засегнати страни во процесот на воведување на е-Фактура. Во изминатиот период биле организирани средби и работилници со шпедитери, општини, јавни претпријатија и компании.
УЈП најавува дека во наредниот период ќе продолжи со активности за информирање, практична поддршка и тестирање на системот, во соработка со институциите и деловниот сектор.
