Нова ескалација во трговската војна: Канада воведува царини за американски производи

Канада воведува контрацарини за повеќе од 700 американски производи како одговор на новата ескалација на трговската војна со САД. Вкупната вредност на опфатената американска стока изнесува 27,6 милијарди долари.

Мерките, кои треба да стапат во сила на 8 септември, се усогласени со американските царини и имаат цел да одговорат „долар за долар“ на давачките што ги воведе американскиот претседател Доналд Трамп за канадските производи.

— реклама —

Канадскиот премиер Марк Карни денеска се состана со лидерите на опозицијата за да разговараат за одговорот на Владата, кој покрај контрацарините вклучува и повеќемилијарден пакет помош за работниците, семејствата и компаниите погодени од трговскиот спор.

— реклама —

Новите канадски царини ќе бидат со стапки од 15, 25 и 50 отсто. Со највисоката стапка ќе бидат опфатени голем дел од американските производи од челик и алуминиум, мебелот и облеката. Царина од 25 отсто ќе се применува за млечни производи, риба, морски плодови и одредени производи од челик и алуминиум.

Постојните канадски контрацарини за американските автомобили остануваат во сила.

— реклама —

Канадската Влада истовремено најави пакет помош вреден 7,5 милијарди долари за работниците и компаниите погодени од трговската војна, особено за малите и средните претпријатија.

Во рамки на мерките се предвидени и дополнителни средства за диверзификација на бизнисите, финансирање за компаниите, како и продолжување на програмите за поддршка на работниците и зачувување на работните места.

Канадската министерка за индустрија Мелани Жоли ги повика граѓаните да купуваат домашни производи, оценувајќи дека на тој начин директно се придонесува за зачувување на работните места во земјата.