Уште една сообраќајна несреќа се случи на нелегалниот пешачки премин кај Бит Пазар, дополнувајќи ја долгата листа на инциденти на оваа локација. Во попладневните часови автомобил удрил во маж и жена додека го преминувале коловозот. Двајцата се здобиле со телесни повреди, но според првичните информации се надвор од животна опасност.
На местото на несреќата интервенирале екипи на Итната медицинска помош и полицијата, кои работат на утврдување на сите околности на случајот.
Граѓаните повторно побараа овој премин да биде легализиран и да се постават семафори и обележан пешачки премин, со цел да се спречат нови несреќи.
Пред неколку дена беше направен обид за затворање на нелегалниот премин, но по реакциите и протестите на граѓаните, работите беа прекинати, а поставените заштитни огради беа отстранети.
Жителите тогаш соопштија дека добиле уверувања оти ќе се разгледа можноста за легализација на преминот. Таквата можност ја потврди и градоначалникот на Скопје, Орце Ѓорѓиевски.
Во изминатите години на ова место се регистрирани десетици сообраќајни несреќи, од кои некои завршиле и со смртни последици.
