Нова пречка за отворање на Ормускиот Теснец: Трамп бара Иран да плати обештетување

Преговорите за повторно отворање на Ормускиот Теснец повторно се најдоа во ќор-сокак, откако американскиот претседател Доналд Трамп побара Иран да плати обештетување за жртвите од конфликтите за кои Вашингтон го обвинува Техеран.

— реклама —

Трамп преку „Truth Social“ порача дека барањето за компензација ќе биде дел од сите идни преговори. Тој побара обештетување и за семејствата на демонстрантите за кои тврди дека биле убиени од иранските власти, како и за жртвите од нападот врз воениот брод „УСС Кол“ во 2000 година.

— реклама —

Од друга страна, Иран условува повторно отворање на стратешкиот поморски премин со прекин на американските воени закани, укинување на санкциите и обештетување за штетата предизвикана од американско-израелските напади.

— реклама —

Портпаролот на иранското Министерство за надворешни работи, Есмаил Багаеи, изјави дека Техеран е блиску до финален договор со Оман за воспоставување нови поморски коридори, но дека сè уште нема договор за условите за отворање на Ормускиот Теснец.

Теснецот е од исклучително значење за глобалната економија, бидејќи пред кризата низ него минувала околу една петтина од светската нафта и течен природен гас. Блокадата веќе предизвика раст на цените на енергенсите, со зголемување на цената на нафтата за повеќе од четири отсто и на европскиот гас за над десет проценти.