Премиерот Христијан Мицкоски најави дека Владата ќе продолжи да ги поддржува приватните инвестиции во енергетиката кои истовремено придонесуваат за зголемување на производството на енергија и намалување на штетните емисии во воздухот.
Изјавата ја даде при пуштањето во употреба на нова приватна когенеративна централа, која истовремено ќе произведува топлинска и електрична енергија.
„Што значи когенеративна централа? Дека во исто време ќе произведува и топлина за затоплување на домовите на граѓаните, но истовремено ќе произведува и електрична енергија. Нешто што навистина претставува успешен проект, особено имајќи ги предвид предизвикувачките времиња коишто ни претстојат оваа зима“, рече Мицкоски.
Тој посочи дека при посетата биле разгледани инсталираните гасни мотори, автоматиката и останатата опрема, како и подготовките на инвеститорот за претстојната грејна сезона.
Мицкоски рече дека бил запознаен и со плановите за понатамошно проширување на инвестицијата.
Според премиерот, значењето на ваквите проекти не е само во дополнителното производство на енергија, туку и во нивното влијание врз животната средина.
„Ова е во насока на подобрување и на квалитетот на животната средина, намалување на емисиите на штетни честички во воздухот и убеден сум дека вакви проекти се само додадена вредност во квалитетот на животот на нашите граѓани“, рече Мицкоски.
Тој најави дека Владата ќе продолжи со поддршка на ваков тип инвестиции.
„Ние како Влада ќе продолжиме да поддржуваме вакви проекти. Нека е аирлија и да ни се множат уште повеќе вакви проекти“, порача Мицкоски.
