Нова саботажа на електроенергетска инфраструктура во Германија: Властите се сомневаат во терористички мотив

Само еден ден по експлозијата на трафостаница во близина на термоцентрала во источна Германија, пријавен е нов инцидент на електроенергетската инфраструктура, овојпат во западниот дел на земјата, во близина на Келн.

Полицијата соопшти дека до краток спој во трафостаница дошло откако непознати лица предизвикале оштетување на високонапонски кабли. Поради тоа, од електроенергетската мрежа биле исклучени неколку блокови на термоцентралата Бергхајм.

— реклама —

Инцидентот не предизвикал прекин во снабдувањето со електрична енергија во домаќинствата, соопшти покраинското Министерство за енергетика.

Министерот за внатрешни работи на покраината Северна Рајна-Вестфалија, Херберт Ројл, изјави дека, според досегашните сознанија, се претпоставува дека зад инцидентот стојат лица од странство или припадници на екстремно левичарски кругови.

„Врз основа на досегашните сознанија, поаѓаме од тоа дека станува збор за напад зад кој стојат или сторители од странство или лица од екстремно левичарската сцена“, изјави Ројл.

— реклама —

Покраинската министерка за енергетика, Мона Нојбаур, го поврза денешниот случај со сличниот инцидент од вчера во источниот дел на земјата. Тогаш експлозија уништи вод во близина на термоцентрала јужно од Берлин.

И во тој случај, полицијата смета дека станува збор за чин насочен против уставниот поредок на Германија.

— реклама —

Во Берлин и западниот дел на Германија, во последните месеци, се регистрирани повеќе напади врз електроенергетската и железничката инфраструктура. Во повеќето случаи, одговорноста ја презела левичарска екстремистичка мрежа.

Инцидентите се случуваат во период на зголемена напнатост меѓу Германија и Русија. Германските власти во последно време предупредуваат и на закани поврзани со таканареченото хибридно војување.

За неодамнешниот инцидент на аеродромот во Лајпциг, германската Влада вчера ја обвини Русија и најави нови санкции, меѓу кои и затворање на рускиот конзулат во Бон.

Во меѓувреме, германската морнарица денеска соопшти дека тестирала израелска ракета со дострел од околу 500 километри.