Нова технологија на скопскиот аеродром: Лаптопите, телефоните и течностите повеќе не се вадат од багажот

Патниците кои патуваат преку Меѓународниот аеродром „Скопје“ од денеска ќе поминуваат низ побрза и поедноставна безбедносна контрола. Благодарение на новата технологија, повеќе нема да има потреба да ги вадат лаптопите, таблетите, мобилните телефони и течностите од рачниот багаж при безбедносната проверка.

Аеродромскиот оператор „ТАВ Македонија“ инвестираше околу еден милион евра во нови системи за безбедносна контрола, меѓу кои два уреди со компјутерска томографија (CT) за скенирање на рачниот багаж и две автоматизирани ленти за враќање на корпите, произведени од британската компанија Smiths Detection.

— реклама —

Генералниот директор на „ТАВ Македонија“, Неџат Курт, изјави дека новата опрема значително ќе го забрза протокот на патници, ќе го намали времето на чекање и ќе ја зголеми удобноста при патувањето.

„Со новата технологија можеме да обработиме до двојно повеќе патници на час по една линија, што е особено важно во периодите на најголем сообраќај“, изјави Курт.

— реклама —

Заменичката на министерот за транспорт, Калтрина Зеколи-Шаќири, оцени дека инвестицијата ќе придонесе за повисоко ниво на безбедност и поефикасна услуга за патниците, нагласувајќи дека ваква технологија засега нема на ниту еден друг аеродром во регионот.

— реклама —

Таа посочи дека досегашната соработка со „ТАВ Македонија“ резултирала со инвестиции од околу 50 милиони евра во повеќе инфраструктурни проекти, додека паралелно продолжува модернизацијата и проширувањето на аеродромот во Охрид.

Според Курт, истите безбедносни системи веќе се користат на некои од најголемите светски аеродроми, меѓу кои Франкфурт, Хитроу и Цирих, како и на водечки аеродроми во САД, Израел и Индија.

Новите скенери се дел од поширок инвестициски циклус во безбедноста на скопскиот аеродром. Минатата година беа реализирани дополнителни инвестиции од речиси два милиони евра за нов систем за видеонадзор и современ центар за обука и сертификација на безбедносниот персонал.

Во првите пет месеци од годинава, двата македонски аеродроми опслужиле 1.580.932 патници, што претставува раст од 31,2 проценти во споредба со истиот период лани. Во истиот период биле реализирани 10.595 летови, односно 9,5 проценти повеќе во однос на 2025 година.