Нова унгарска влада: Ќе ги отвориме архивите на тајната полиција од комунизмот

Новата унгарска влада ќе ги отвори историските архиви на тајната полиција од комунистичкиот период, откри лице кое ќе го води кабинетот на Петер Маѓар, победник на парламентарните избори овој месец, кој се очекува да стане премиер на 9 мај.

Унгарската партија „Тиса“ победи на 12 април над Фидес на искусниот лидер Виктор Орбан, меѓу другото и благодарение на ветувањата дека ќе ја врати Унгарија на проевропскиот пат, ќе го оживее ослабеното стопанство и ќе обезбеди одблокирање на милијарди евра средства од Европската унија, кои досега беа замрзнати.

— реклама —

Балинт Руф, кого Маѓар денес го потврди како кандидат за шеф на кабинетот на премиерот, за порталот Valasz Online изјави дека отворањето на архивите на тајната полиција ќе биде негов „приоритет број еден“.

— реклама —

„Ова е задача за историчарите. Но, јас ќе обезбедам следната влада да создаде рамка за таа работа, односно да овозможи истражување без политички притисок“, изјави Руф, адвокат и политички советник.

За разлика од Полска или Чешка, Унгарија никогаш официјално не ги откри имињата на соработниците на тајната полиција од комунистичкиот период, иако низ годините некои имиња се појавуваа во медиумите.

— реклама —

Поединци можат да имаат пристап до сопствените досиеја, но не и до материјали за други лица, вклучително и за поранешни доушници.

— реклама —

Историчарот Криштијан Унгвари, гласен поддржувач на целосна транспарентност, на предавање во 2023 година изјави дека, иако „минатото на јавните личности не е јавно, тие постојано ќе бидат изложени на уцени од оние кои имаат пристап до информации за нивното минато“.

Руф истакна дека неговата цел е да формира канцеларија за враќање на милијарди форинти изгубени поради корупција, како и да ги надгледува прашањата поврзани со Европската унија, со цел Маѓар внимателно да го следи процесот на одблокирање на европските средства.