Тешките последици од големиот пожар што во август го зафати подрачјето на Омиш продолжуваат да се чувствуваат и недели подоцна. Во КБЦ Сплит почина уште една пациентка која се здобила со тешки повреди во пожарот.
Од Клиничкиот болнички центар Сплит информираа дека починатата жена била родена во 1968 година. И покрај интензивното лекување и напорите на лекарите, таа не успеала да ги преживее последиците од повредите.
„И покрај сите преземени мерки за интензивно лекување и напорите на медицинскиот тим, во сплитската болница почина уште едно лице, родено во 1968 година, како последица на повредите здобиени во пожарот на подрачјето на Омиш“, соопштија од болницата.
Од КБЦ Сплит додаваат дека двајца пациенти и натаму се лекуваат на одделот за интензивна нега и се во животна опасност. До семејството на починатата упатиле сочувство.
Пожарот избувна на 13 август во шумски предел покрај патот во Локва Рогозница. Силниот ветер дополнително го разгоре огнот, кој за кратко време се прошири во правец на Омиш.
Огнот зафати појас долг околу 23 километри, при што изгореа приближно 1.000 хектари. Биле уништени куќи, објекти и возила, а десетици лица биле повредени.
Првата жртва беше 34-годишна државјанка на Босна и Херцеговина, чие тело било пронајдено во Мала Лука, во близина на Станиќи. Кон крајот на август почина и 79-годишен маж, кој по повредите бил хоспитализиран во КБЦ Сплит.
Со смртта на пациентката родена во 1968 година, трагичниот биланс на пожарот повторно се зголеми. Во болницата и натаму остануваат двајца тешко повредени пациенти, чиј живот е во опасност.
